माओवादी केन्द्रमा २५% Gen Z प्रतिनिधित्व माग

काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’लाई पार्टीका Gen Z कार्यकर्ताहरूले पार्टीको सबै तहमा २५ प्रतिशत प्रतिनिधित्व सुनिश्चित गर्न माग गर्दै ज्ञापनपत्र बुझाएका छन् ।

बुधबार पार्टी मुख्यालय पेरिसडाँडामा प्रचण्डलाई  बुझाइएको ज्ञापनपत्रमा १९९७ देखि २०१२ बीच जन्मिएका कार्यकर्ताहरूलाई पार्टीको संरचनामा कम्तिमा २५ प्रतिशत स्थान दिनुपर्ने माग गरिएको छ ।

Gen Z कार्यकर्ता समूहले बुझाएको ज्ञापनपत्रमा लेखिएको छ, “हामी सक्रिय कार्यकर्ता तथा समर्थकको साझा आवाजका रूपमा तपाईं समक्ष प्रस्तुत भएका छौं । हाल नेपालको ठूलो हिस्सा Gen Z मा भएकाले उनीहरूको आवाज संरचनागत तहमा प्रतिबिम्बित हुनुपर्छ ।”

उनहरूले पार्टी विधान संशोधनमार्फत आरक्षण व्यवस्था गर्ने, विशेष अधिवेशन वा महाधिवेशनमार्फत संख्यात्मक प्रतिनिधित्व सुनिश्चित गर्ने, विभागीय संरचनामा Gen Z समन्वय समिति गठन गर्ने र नेतृत्व विकास कार्यक्रम सञ्चालन गर्न सुझाव दिएका छन् ।

ज्ञापनपत्रमा नयाँ पुस्ताको ऊर्जा, प्रविधि–दक्षता र नयापनले मात्र पार्टीलाई दीर्घकालीन रूपमा जीवन्त बनाउन सक्ने उल्लेख छ । साथै, नयाँ पुस्तालाई अवसर दिएन भने उनीहरू पार्टीबाहिर जान बाध्य हुने र संगठन कमजोर हुने चेतावनीसमेत कार्यकर्ताहरूले दिएका छन् ।

Gen Z कार्यकर्ताले आफ्नो मागलाई “केवल कोटा वा सांकेतिक समावेशीकरण नभई पार्टी सुदृढीकरण, सशक्तीकरण र समयानुकूलताको अपरिहार्य पाटो” का रूपमा लिइनुपर्ने बताएका छन् ।