nayapana
काठमाडौं । नेकपा (माओवादी केन्द्र) सम्बद्ध विद्यार्थी संगठन अनेरास्ववियू (क्रान्तिकारी) का उपाध्यक्ष सन्दिप पुनले जेन-जि आन्दोलनपश्चात माओवादी केन्द्रभित्र देखिएको परिस्थितिबारे सामाजिक सञ्जालमार्फत तीव्र प्रतिक्रिया दिएका छन्।
फेसबुकमार्फत विचार व्यक्त गर्दै उनले पार्टीभित्र चाकडी संस्कृति, गुटगत राजनीति र अवसरवादी प्रवृत्तिको तीव्र आलोचना गरेका छन्। पुनका अनुसार, गलत प्रवृत्तिको विरोध गर्नेहरूलाई “रैती” बनाएर प्रस्तुत गर्ने, नेतृत्वलाई चापलुसीमार्फत घेराबन्दी गर्ने र व्यक्तिगत स्वार्थका लागि नेताको खुट्टा चाट्ने प्रवृत्तिले पार्टी र आन्दोलन दुवै कमजोर बनेका छन्।
उनले भने, “हिजो जनयुद्धमा एकअर्काका लागि मर्नसम्म तयार रहेका नेताहरू आज एकअर्कामाथि विश्वास गर्न नसक्ने अवस्थामा पुगेका छन्। नेतृत्वको बचाउको नाटक र लाइन संघर्षको नाममा दलाली गर्ने विचौलियाहरूमार्फत नै आजको अविश्वासपूर्ण वातावरण बनेको हो।”
आन्दोलन र पार्टीलाई जोगाउन अब नयाँ पुस्ता र निराश कार्यकर्ताले नै ठोस भूमिका खेल्नुपर्ने उनको धारणा छ। पुनले पार्टीको कार्यदिशा, कार्यशैली र केन्द्रीय समितिको पुनःसंरचना अपरिहार्य भएको औंल्याए।
अन्य दलसँग तुलना गर्दै उनले भने, “काङ्ग्रेससँग देशका निजी संयन्त्रहरू छन्, एमालेसँग NGO/INGO र सहकारीहरू छन्। तर, हिजो हामी गर्वका साथ भन्थ्यौँ— ‘माओवादीसँग जनता छन्।’ तर, आज निर्मम भएर प्रश्न गर्नुपर्छ— को छन् र के छ हाम्रो साथमा?”
उनको अभिव्यक्ति हालैको जेन-जि आन्दोलनपछि माओवादी केन्द्रभित्र बढिरहेको गुटबन्दी, नेतृत्वको संकट र नयाँ पुस्ताको भूमिकासम्बन्धी बहससँग प्रत्यक्ष जोडिएको देखिन्छ।
nayapana
प्रतिक्रिया