मन्त्रालयमै बस्छु, ओछयान र भान्साको व्यवस्था मिलाइदिनु : महावीर पुन

शिक्षा, विज्ञान तथा प्रविधि मन्त्रीमा नियुक्त भएका महावीर पुनले पदभार ग्रहणसँगै आफूलाई कुनै अतिरिक्त सेवा–सुविधा नचाहिने स्पष्ट पारेका छन्।

सोमबार मन्त्रालयमा पदभार ग्रहण गर्दै सञ्चारकर्मीहरूसँग कुरा गर्दा उनले मन्त्री पदसँगै आउने विशेष सुविधा अस्वीकार गर्ने घोषणा गरे। “मन्त्री क्वार्टर चाहिँदैन, मन्त्रालयमै सानो ओछ्यान र भान्साको व्यवस्था भए पुग्छ,” उनले भने, “एउटा भान्सा बनाइदिनुहोस्, म आफैं खाना बनाएर खान्छु।”

पुनले सुरक्षा व्यवस्थाबारे पनि असन्तोष प्रकट गर्दै सुरक्षाकर्मीको आवश्यकता नभएको उल्लेख गरे। “मैले सुरक्षाकर्मीलाई पनि भनेको छु— माथि खबर गर्नुहोस्, मलाई सुरक्षा चाहिँदैन,” उनले प्रष्ट पारे।

यद्यपि, आफूले व्यक्तिगत गाडी नभएकाले आवश्यकताअनुसार मन्त्रालयले साधन उपलब्ध गराइदिनुपर्ने उनले अनुरोध गरे।

पदभार ग्रहण गर्ने दिनमै मन्त्री पुनले विज्ञान तथा प्रविधि क्षेत्रमा अनुसन्धान र नीति सुदृढीकरणका लागि चारवटा सल्लाहकार समिति गठन गर्ने निर्णयमा हस्ताक्षर गरेका छन्। यी समितिहरू अन्तरिक्ष प्रविधि, न्यूक्लियर प्रविधि, बायोटेक्नोलोजी र सूचना प्रविधि तथा कृत्रिम बुद्धिमत्ता (एआई) सम्बन्धी सल्लाह प्रदान गर्ने जिम्मेवारीमा रहनेछन्।

मन्त्रालयका अनुसार समितिहरूको कार्यक्षेत्र प्रस्ताव गरिएको छ भने सदस्यहरूको नाम पछि टुंगो लगाइनेछ।