‘छत्रपति संभाजी महाराज रत्न सम्मान–२०२५’ बाट अखिल (क्रान्तिकारी)का नेता जैशी सम्मानित

अखिल (क्रान्तिकारी)का नेता  सशांक जैशी ‘छत्रपति संभाजी महाराज रत्न सम्मान २०२५’ बाट सम्मानित भएका छन्।

भारतको राजधानी नयाँदिल्लीस्थित प्रतिष्ठित ‘भारत मण्डपम’ मा आयोजित विशेष समारोह ‘जयघोष कार्यक्रम’ मार्फत उनलाई यो सम्मान प्रदान गरिएको हो।

समारोहमा भारतीय जनता पार्टी (भाजपा) का केन्द्रीय महामन्त्री तरुण चुग र दिल्ली प्रदेशका कला, संस्कृति तथा भाषा मन्त्री कपिल मिश्रको प्रमुख आतिथ्य रहेको थियो। सम्मान कार्यक्रमको आयोजना छत्रपति संभाजी महाराजको आदर्श र योगदानलाई स्मरण गर्दै गरिएको हो।

अखिल (क्रान्तिकारी) विदेशी विश्वविद्यालय समिति अध्यक्षका रूपमा सक्रिय जैशीलाई विद्यार्थी आन्दोलन र सामाजिक न्यायको पक्षमा पुर्‍याएको उदाहरणीय योगदानका आधारमा यो सम्मान प्रदान गरिएको आयोजक संस्थाले जनाएको छ। कैलाली जिल्लाको टीकापुर निवासी जैशीले विभिन्न अन्तर्राष्ट्रिय मञ्चहरूमा नेपाली युवाको आवाज बुलन्द गर्दै सामाजिक रुपान्तरणका पक्षमा उल्लेखनीय काम गर्दै आएका छन्।

छत्रपति संभाजी महाराज रत्न सम्मान भारतको एक प्रतिष्ठित नागरिक सम्मान मानिन्छ, जुन समाज, राष्ट्र र युवाको नेतृत्व विकासमा योगदान दिने विशिष्ट व्यक्तित्वहरूलाई प्रदान गरिन्छ।