‘प्रगतिशील राष्ट्रिय अभियान’ : रुकुममा सन्देशकाे नेतृत्वमा नयाँ राजनीतिक विकल्पको उद्घोष

नेकपा (माओवादी केन्द्र) एकता प्रक्रियामा गएर ‘नेपाली कम्युनिष्ट पार्टी’ बनेपछि असहमति जनाउँदै पूर्वमन्त्री तथा वरिष्ठ नेता जनार्दन शर्मा ‘प्रभाकर’को नेतृत्वमा नयाँ राजनीतिक शक्ति निर्माणका उद्देश्यले ‘प्रगतिशील राष्ट्रिय अभियान’ घोषणा गरिएको छ।

रुकुम, जो माओवादी आन्दोलनको ऐतिहासिक आधारभूमि मानिन्छ, त्यहीँबाट अभियानको औपचारिक सुरुवात गरिएको हो। उक्त अभियानको संयोजन जिम्मेवारी **गोरख बहादुर केसी ‘सन्देश’**ले सम्हालेका छन्। उनले बुधवार एक विज्ञप्ति जारी गर्दै माओवादी केन्द्रको हालको राजनीतिक, संगठनात्मक र नैतिक अवस्थाप्रति गम्भीर असन्तोष व्यक्त गर्दै नयाँ राजनीतिक विकल्पको आवश्यकता औंल्याएका छन्।

विज्ञप्तिमा भनिएको छ — “गौरवशाली इतिहास बोकेको नेकपा (माओवादी केन्द्र) शान्ति प्रक्रियामा सहभागी भएपछि आफ्नो उद्देश्य र कार्यदिशामा क्रमशः अस्पष्ट बन्दै गयो। नेतृत्वको भड्किलो जीवनशैली, संगठन सञ्चालनमा विधि र प्रणालीको अभाव तथा जनताको भरोसामा आएको निरन्तर गिरावटका कारण पार्टी उठ्नै नसक्ने गरी थलिँदै गएको छ।”

केसीले माओवादी केन्द्र सुधार हुने सम्भावना समाप्त भइसकेको उल्लेख गर्दै भनेका छन् — “आज पार्टी केही वृद्ध नेताहरूको जमघट केन्द्रजस्तो बनेको छ, जसले अब कुनै परिवर्तनको नेतृत्व गर्न सक्दैन।”

विज्ञप्तिमा माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्व शैलीमाथि पनि तीव्र प्रहार गरिएको छ। “क. प्रचण्ड रेल छुट्यो भन्दै हुनुहुन्छ, तर यसको अवस्था रेल होइन कि मानिसले चलाउन छोडेको जर्जर बस जस्तो हो,” भन्दै केसीले वर्तमान नेतृत्वले जनताको अपेक्षाअनुसार देशलाई दिशा दिन असमर्थ भएको टिप्पणी गरेका छन्।

उनका अनुसार, पुराना दलहरूले संरक्षण गरेको भ्रष्टाचार, कुशासन र नीतिगत दिशाहीनताको विरोध स्वरूप रुकुमबाट ‘प्रगतिशील राष्ट्रिय अभियान’ सुरु गरिएको हो। अभियान अन्तर्गत शिक्षक, बुद्धिजीवी, व्यवसायी, विद्यार्थी, जेन–जी युवा र विभिन्न वर्गका नागरिकसँग संवाद र परामर्श सुरु गरिएको छ।

केसीले विश्वास व्यक्त गरेका छन् कि यो अभियान निकट भविष्यमा एक सशक्त वैकल्पिक राजनीतिक शक्तिका रूपमा विकसित हुनेछ। “यो अभियानले रुकुमेली जनताको भावना, सहिद र वेपत्ता योद्धाहरूको सपना तथा नयाँ पुस्ताको चाहनालाई राजनीतिक रूपान्तरणको दिशामा अघि बढाउनेछ,” उनले भनेका छन्।

विज्ञप्तिमा रुकुमका युवाहरूलाई अभियानको मेरुदण्डको रूपमा उल्लेख गर्दै भनिएको छ — “अबको समय युवाहरूकै हो। वैकल्पिक राजनीतिक शक्ति निर्माणमा उनीहरूकै निर्णायक भूमिका रहनेछ।”

संयोजक केसीले जनार्दन शर्मा ‘प्रभाकर’लाई वैकल्पिक राजनीतिक शक्ति निर्माणको “राजनीतिक अभिभावक”का रूपमा वर्णन गर्दै रुकुमेली युवाहरू उनको साथमा संगठित र ऊर्जावान रूपमा अघि बढिरहेको बताएका छन्।

अन्त्यमा उनले भनेका छन् — “यो यात्रा कठिन अवश्य छ, तर परिस्थिति अत्यन्त अनुकूल बनेको छ। विद्रोही जनभावना अहिले नेतृत्वविहीन देखिन्छ र नयाँ वैकल्पिक राजनीतिक शक्ति निर्माणको व्यग्र प्रतीक्षा गरिरहेको छ।”