“विचार र नीति गलत थिएन, तर व्यवहारमा चुक्यौं”,हामी विधिवत् रूपमा नेतृत्व परिवर्तन गर्छौं

नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले पार्टीभित्र नेतृत्व हस्तान्तरणबारे औपचारिक छलफल सुरु भइसकेको खुलासा गरेका छन्। संविधान दिवसको अवसरमा बिहीबार जारी भिडियो सम्बोधनमार्फत उनले विगतका कमजोरीहरू स्वीकार गर्दै पार्टीलाई सुधार गर्ने प्रतिबद्धता व्यक्त गरेका हुन्।

“हामीले देशविरुद्ध कुनै राष्ट्रघाती सम्झौता गरेका छैनौं, कुनै काण्डमा मुछिएका छैनौं, र भ्रष्टाचारविरुद्ध जुधिरहेकै छौं,” उनले भने, “तर जनताको अपेक्षाको तुलनामा हामी कमजोर देखियौं। हामी आफूलाई सच्याइरहेका छौं र अझ सुधार गर्नेछौं। नेतृत्व हस्तान्तरणबारे निश्चित विधि र प्रक्रियाअनुसार छलफल भइरहेको छ।”

विगतका व्यवहारगत चुकहरू स्वीकार
अध्यक्ष दाहालले अतीतमा पार्टीबाट भएका व्यवहारगत कमजोरीहरू स्वीकार गर्दै राजनीतिक दृष्टिकोण र नीतिहरू गलत नभए पनि व्यवहारमा कमजोरी आएको बताए। “हामीले विचार वा नीति गलत लिएका होइनौं, तर व्यवहारमा कतै न कतै चुक्यौं,” उनले भने।

उनले जनयुद्धकालदेखि पार्टीसँग जीवन्त सम्बन्ध रहेका वर्ग, समुदाय र पीडित समूहहरूसँगको सम्बन्ध कमजोर भएको पनि स्वीकार गरे। “शहीद परिवार, बेपत्ता, अपांग, घाइते र यातनापीडित साथीहरूप्रतिको हाम्रो उत्तरदायित्वमा हामी कतै न कतै अलमलियौं,” उनले आत्मालोचना गरे।

गठबन्धनको बाध्यात्मक राजनीतिले पार्टीको धार कमजोर बनाएको टिप्पणी गर्दै उनले भने, “हामी कहिल्यै एक्लै सरकारको नेतृत्व गर्न सक्ने अवस्थामा रहेनौं। गठबन्धनको बाध्यात्मक राजनीतिले कतिपय अवस्थामा हामीलाई बिटुलो बनायो।”

निर्वाचन समयमै गर्नुपर्नेमा जोड
प्रचण्डले आगामी निर्वाचन तोकिएको मितिमा सम्पन्न हुनुपर्नेमा जोड दिँदै मुलुकलाई अस्थिरता र षड्यन्त्रबाट जोगाउन निर्वाचनको समयमै सम्पन्नता आवश्यक रहेको बताए।

“देश र जनताविरुद्धका षड्यन्त्रहरू सकिएका छैनन्। अन्तरिम सरकारलाई असफल बनाउने प्रयास सुरु भइसकेको छ,” उनले भने, “निर्वाचन समयमा नै सम्पन्न हुनुपर्छ भन्ने हाम्रो स्पष्ट धारणा हो।”

संविधान र लोकतन्त्रको रक्षामा ‘साझा कर्तव्य’
संविधान र लोकतान्त्रिक गणतन्त्रको रक्षाका लागि सबै लोकतान्त्रिक, गणतान्त्रिक र परिवर्तनप्रेमी शक्तिबीच एकता आवश्यक रहेको प्रचण्डको भनाइ छ। “लोकतन्त्रको विकल्प अझ उन्नत लोकतन्त्र हो,” उनले चेतावनी दिँदै भने, “इतिहासको चिहानबाट फर्केका शक्तिहरू युवाहरूको परिवर्तन चाहनालाई प्रयोग गरेर जनताका उपलब्धि उल्ट्याउन खोजिरहेका छन्।”

उनले संविधान र लोकतन्त्रप्रति विचलन राष्ट्रलाई समाधान होइन, संकटतर्फ लैजाने चेतावनी पनि दिए। “संविधान र लोकतन्त्रको रक्षामार्फत मात्रै राष्ट्रको स्वतन्त्रता जोगाउन सकिन्छ,” उनले जोड दिए।

२३ र २४ भदौका घटनामा फरक विश्लेषण
प्रचण्डले भदौ २३ गते भएको आन्दोलनलाई ‘वास्तविक जेन–जी आन्दोलन’को रूपमा व्याख्या गरे पनि त्यसपछिका दिनहरूमा भएको हिंसा, तोडफोड र आगजनीलाई षड्यन्त्रपूर्ण गतिविधि भनेका छन्।

“२३ भदौमा सरकारप्रति जनतामा देखिएको आक्रोश स्वाभाविक थियो,” उनले भने, “तर २४ भदौमा सिंहदरबार, सर्वोच्च अदालत, संसद भवनलगायत राष्ट्रका गौरवपूर्ण संरचनामा भएको तोडफोड, लुटपाट र आगजनी आन्दोलनकारीको काम थिएन। ती प्रतिगमनकारी र आपराधिक तत्त्वहरूद्वारा जनताको उपलब्धिमाथि गरिएको प्रहार थियो।”

उनले ती घटनाले देशलाई इतिहासकै गम्भीर संकटमा धकेलेको बताउँदै मुलुकलाई अस्थिरताको दलदलबाट बाहिर निकाल्न लोकतान्त्रिक अभ्यास बलियो बनाउनुपर्ने धारणा राखे।