देशका १० प्रमुख सहरमा नि:शुल्क इन्टरनेट सेवा उपलब्ध गराउने सञ्चारमन्त्रीको पहिलो निर्णय

नवनियुक्त सूचना, सञ्चार तथा प्रविधि मन्त्री जगदिश खरेलले पदभार ग्रहणलगत्तै देशका १० प्रमुख सहरका सार्वजनिक स्थलमा नि:शुल्क इन्टरनेट सेवा उपलब्ध गराउने निर्णय गरेका छन्।

मन्त्रालयले सार्वजनिक गरेका विवरणअनुसार पाँच महिनाभित्र सो सेवा जडान पूरा गर्नुपर्नेछ। यस क्रममा पार्क, चौर, बसपार्क, पुस्तकालयलगायत सर्वसाधारण बढी भिडभाड हुने स्थानलाई प्राथमिकतामा राखिने भएको छ।

यसअघि मन्त्रालयका कर्मचारीले प्रस्तुत गरेको प्रारम्भिक प्रस्तावमा मन्त्री खरेलले हस्ताक्षर गर्न अस्वीकार गरेका थिए। उनले ‘योजना अझ ठोस बनाउन’ निर्देशन दिएपछि कर्मचारीहरूले १० सहरलाई समेट्ने गरी परिमार्जित प्रस्ताव पेश गरेका थिए, जसमा उनले अन्ततः सहमति जनाएका हुन्।

मन्त्री खरेलले यस निर्णयलाई डिजिटल पहुँच विस्तारतर्फको पहिलो ठोस कदमका रूपमा लिँदै जनतालाई आधुनिक प्रविधिको सहज सुविधा उपलब्ध गराउने प्रतिबद्धता व्यक्त गरेका छन्।