गोरखा मिडियाको लगानीबारे रवि र जीबीलाई थाहा छ, मलाई छैनः छविलाल जोशी

सहकारी ठगी छानबिन विशेष संसदीय समितिमा गोरखा मिडिया प्रालिका तत्कालीन सञ्चालक छविलाल जोशीले बयान दिएका छन् । समितिले शुक्रबार उनीसँग गोरखा मिडिया प्रालिमा भएको लगानीबारे सोधपुछ गरेको हो ।

यो प्रालिले विभिन्न सहकारीबाट अवैध रूपमा ठूलो रकम ल्याई डुबाएको छ । त्यसैले यसका पुराना सञ्चालक रहेका जोशीसँग संसदीय समितिले बयान लिएको हो । यो मिडिया प्रालिका अध्यक्ष रहेका गितेन्द्रबाबु राई (जीबी) ले आफैँ अध्यक्ष रहेका विभिन्न सहकारीबाट ठूलो रकम ल्याएर मिडियामा लगानी गरेका छन् । अहिले उनी सहकाडरीको करोडौँ रकम डुबाएर फरार छन् ।

राजनीतिमा आउनुअघि रास्वपा सभापति रवि लामिछाने गोरखा मिडिया प्रालिको म्यानेजिङ डाइरेक्टर थिए । त्यति मात्र होइन, लामिछानले जीबी राईकै नेतृत्वमा रहेको बुटवलको सुप्रिम सहकारीबाट ऋण लिएको समेत पाइएको छ ।

शुक्रबार समितिमा जोशीले मिडियामा भएको लगानीबारे आफूलाई जानकारी नभएको बयान दिएका छन् । स्रोतका अनुसार उनले मिडियामा भएको लगानीको स्रोतबारे जीबी राई र रवि लामिछानेलाई जानकारी रहेको बताएका छन् ।

समितिले शुक्रबारै रवि लामिछानेसँग पनि बयान लिँदै छ । जोशीको बयान सकिएपछि रविको बयान सुरु हुनेछ ।