मेलम्चीको पाइप फुटेर जलमग्न भएपछि भाँसियो बबरमहलको सडक

काठमाडौं । मेलम्ची खानेपानी आयोजनाको पाइप फुटेर जलमग्न भएपछि काठमाडौंस्थित बबरमहलको सडक भाँसिएको छ । सडक भाँसिएपछि हाल आवतजावत रोकिएको छ।

आज दिउँसो विद्युत् प्राधिकरणले विद्युत्का तारहरू अण्डरग्राउण्ड गर्नका लागि ‘होरिजोन्टल ड्रिलिङ’ गर्ने क्रममा बबरमहलस्थित खानेपानीको थोक वितरण प्रणालीको पाइप फुटेपछि सो क्षेत्र जलमग्न भएको हो ।

काठमाडौँ उपत्यका खानेपानी आयोजना कार्यान्वयन निर्देशनालय (पिआइडी) का प्रमुख टीकाबहादुर चौधरीले विद्युत्का तारहरू अण्डरग्राउण्ड गर्नका लागि ‘होरिजोन्टल ड्रिलिङ’ गर्ने क्रममा खानेपानीको थोक वितरण प्रणालीको पाइप फुटेको जानकारी दिए । उनले भने, “पाइप फुटेपछि पानी वितरण गर्ने भल्ब बन्द गरी पाइप सफा गर्नेकाम (वास आउट) भइरहेको छ । हालसम्म पानी बग्न भने रोकिएको छैन ।”

अन्तरनिकाय समयवय निकै कमजोर हुँदा यस्ता समस्या पटक पटक घट्ने गरेका छन् ।