एसियन गेम्स क्रिकेट छनोट खेल्न नेपाली टोली सिंगापुर प्रस्थान

एसियन गेम्स क्रिकेट छनोट प्रतियोगिता खेल्न नेपाली पुरुष राष्ट्रिय क्रिकेट टोली सिंगापुर प्रस्थान गरेको छ ।

नेपाल क्रिकेट संघ (क्यान)ले बिहीबार काठमाडौंमा आयोजित एक कार्यक्रमबीच टोलीलाई औपचारिक बिदाई गरेको हो । प्रतियोगिता आगामी मे ३१ देखि सिंगापुरमा सुरु हुँदैछ ।

प्रतियोगितामा समूह ‘ए’ मा नेपाल, मलेसिया र चीन रहेका छन् भने समूह ‘बी’ मा ओमान, हङकङ, बहराइन र आयोजक सिंगापुर रहेका छन् । यसअघि समूह ‘ए’ मा रहेको कतारले भने प्रतियोगिताबाट नाम फिर्ता लिएको छ ।

बिदाई कार्यक्रममा नेपाली टोलीका कप्तान दीपेन्द्रसिंह ऐरीले टोलीको माहोल निकै सकारात्मक रहेको बताउँदै सिंगापुरमा राम्रो नतिजा ल्याउने विश्वास व्यक्त गरे ।

त्यस्तै राष्ट्रिय टोलीका मुख्य प्रशिक्षक स्टुअर्ट लले पनि टोली प्रतियोगिताका लागि उत्साहित र तयार रहेको भन्दै उत्कृष्ट प्रदर्शन गर्ने अपेक्षा व्यक्त गरे ।

प्रतियोगिताको सेमिफाइनलमा पुग्ने टोलीले एसियन गेम्सको पुरुष क्रिकेट प्रतियोगिताका लागि छनोट हुनेछन् । एसियन गेम्सअन्तर्गत क्रिकेट प्रतियोगिता आगामी सेप्टेम्बर १७ देखि अक्टोबर ३ सम्म जापानको आइची–नागोयामा आयोजना हुनेछ ।

भारत, पाकिस्तान, श्रीलंका, बंगलादेश, अफगानिस्तान तथा आयोजक जापान भने सिधै एसियन गेम्सका लागि छनोट भइसकेका छन् ।